கவிதைகளைப் பற்றி நண்பர் எம் எழுதிய கடிதங்களில் தேர்ந்தெடுக்கப்பட்ட சில:

1)அன்புள்ள k j,
இன்று உங்களுடைய ‘அவன்’ என்ற கவிதையை வாசித்தேன். 
அவன்———-

எங்கும் இருண்டிருந்தது

அவன் என்னையே பார்த்துக் கொண்டிருந்திருப்பான் போல

சட்டென்று அவன் இருப்பை உணர்ந்தேன்

‘யார் நீ’ என்றேன்

சலனமற்றிருந்தான்

அவன் யாரெனக் காண ஆவல்கொண்டேன்

அவனை நோக்கிச் செல்ல முயன்றேன்

பாழிருள்

வெளிச்சமேற்ற பல வகைகளில் முயன்றேன்

அவன் இருப்பை இழக்காதிருக்க

அவனையே அவதானித்திருந்தேன்

என்னுடையவை அனைத்தோடும்

அவனோடேயே இயைந்திருந்தேன்

சிறு வெளிச்சம் போதும்

அவனைப் பார்த்து விடுவேன்

ஒரு பெரும் மின்னல்

அவனைக் கண்டு விட்டேன்

ஆ..

அது நானே

***

இந்த கவிதையை நான் அணுகும் விதத்தை வாசிக்கும் முறையை தெரிவிக்கிறேன். 

1. இக்கவிதையின் தலைப்பு கவிதையின் ஒரு பகுதியாக உள்ளது. கவிதையை அர்த்தப்படுத்திக் கொள்வதன் முக்கியமான திறவுகோலும் கூட. ‘’அவன்’’ என்ற தலைப்பு ‘’நானே’’ என முடிகிறது. உபநிடதம் ‘’நீதான் அது’’ (தத்வமஸி) என சுட்டுகிறது. இக்கவிதை ‘’அது நானே’’ என்னும் இடத்துக்குச் செல்கிறது. இக்கவிதையில் தலைப்பு முக்கியமானது. 

2. ‘’எங்கும் இருண்டிருந்தது’’ இது எவ்வகையான நிலம் – எந்த காலம் என்று வாசகனைக் கற்பனை செய்ய வைக்கும் வரி. ஒருவிதமான நிலையின்மையை வாசகன் உணரக் கூடும். 

3. ‘’அவன் என்னையே பார்த்துக் கொண்டிருப்பான் போல’’ . இந்த வரியில் ‘’போல’’ என்ற உருபைச் சேர்த்தது மிகவும் பொருத்தமானது.  அது அப்படியும் இருக்கலாம்; அப்படி இல்லாமலும் இருக்கலாம் என்ற உறுதியின்மையை உருவாக்குகிறது. 

முதல் வரயில் ‘’நிலையின்மை’’. இரண்டாம் வரியில் ‘’உறுதியின்மை’’. 

4.’’ சட்டென்று அவன் இருப்பை உணர்ந்தேன்’’. ‘’உணர்தல்’’

5. ’’யார் நீ’’ என்றேன். ‘’உரையாடல்’’. ‘’வினவுதல்’’ . இந்த வினா எவ்வாறு எழுப்பப்பட்டிருக்கும் என்பதற்கான சாத்தியங்களை வாசகன் கற்பனை செய்து கொள்ள வேண்டும். சினத்துடன் எழுப்பப்பட்டதா சஞ்சலத்துடன் எழுப்பப்பட்டதா மெல்ல கேட்கப்பட்டதா என. எப்படியாயினும் சலனமுற்ற கேள்வி. 

6. ’’சலனமற்றிருந்தான்’’ . சலனமற்றிருக்கும் அவன் யார்? சலனமின்மையை இருப்பாகக் கொண்டிருக்கும் அவன் யார்? வாசகன் மனத்தில் கேள்விகள்

7. பின்னர் உருவாவது ஆவல். அதன் பின் முயற்சி. எனினும் உணர்வது ‘’பாழிருள்’’

8. உங்கள் கவிதையை ஒரு வளையம் எனக் கொண்டால் முதல் வரியிலிருந்து ‘’பாழிருள்’’ என்னும் வரி வரையான வரை அதனுள் இயங்கும் சிறு பின்னல். 

நீங்கள் சித்தரிப்புகளின் வழியாக உணர்வை உருவாக்குகிறீர்கள். எவ்வித அடையாளங்களும் இல்லாத சித்தரிப்புகள். எல்லா அடையாளங்களுக்கும் பொருந்தும் சித்தரிப்புகள். 

9. அதன் பின் முயற்சி. தவிப்பு. ‘’சிறு வெளிச்சத்துக்கான’’ ஏக்கம். 

10. ஒரு பெரும் மின்னல்

11. கண்டடைதல்

12. தன்னை உணர்தல்

13. அது நிகழ்ந்ததன் மாயத் தன்மை. 

14. வளையம் நிறைவாகும் விதம்.

உங்கள் கவிதை சில வரிகளில் காட்டும் காட்சிகளும் நிலமும் உணர்வுகளும் அவற்றுக்குள் இருக்கும் ஒருங்கமைப்பும் மிகச் சிறப்பானது.

சொல் கவிதையாவதன் மாயம் போல தன்னை உணர்தலின் மாயமும் இருக்கிறது. 

நல்ல கவிதை. 

அன்புடன்,

எம்

******

அன்புள்ள kj அவர்களுக்கு,
‘சித்திரம்’ கவிதை வாசித்தேன். 
Micro Narration-ல் நீங்கள் ஒரு தனி பாணியை கைக்கொள்கிறீர்கள். 
குழந்தைகள் அறை. அறையின் சுவர்கள் உருவாக்கும் எல்லைகளைக் கடந்து செல்லும் அகம் கொண்ட குழந்தைகள் குதூகலத்தின் உலகை அவ்வப்போது அங்கு உருவாக்குகிறார்கள். 
அந்த உலகை Wall paperல் இருக்கும் பிராணிகள் வாஞ்சையுடன் தினமும் பார்க்கின்றன. ஒட்டகச் சிவிங்கியும் மானும் முயலும் உறைந்திருக்க யானை மட்டும் அறைக்குள் வருகிறது. சின்னக் குழந்தைகளின் உலகில் இணைந்து கொள்ள விழையும் அந்த ஆனையைக் குறித்து கற்பனை செய்து கொள்ளும் சுதந்திரத்தை வாசகனுக்கு உங்கள் பிரதி அளிக்கிறது. 
பிளிறலும் நடனமும் உருவாக்கும் திகைப்பில் அறையை விட்டு வெளியே ஓடுகின்றனர் குழந்தைகள். அதுவும் ஆட்டத்தின் ஒரு பகுதியே. 
யானை சுவருக்குள் செல்கிறது. அதில் ஒரு மெல்லிய துக்கம் இருக்கிறது. அவ்வாறான ஒரு வாசிப்புக்கும் கவிதை இடம் தருகிறது. 
நான் அந்த யானையின் பிரியம் குழந்தைகளையும் தன் உலகுக்குள் கொண்டு வர முடியும் என்றும் மேலும் சுவர்களுக்கு அப்பால் இருக்கும் எல்லையின்மையின் உலகுக்குள்ளும் குழந்தைகளையும் தன்னையும் இட்டுச் செல்லும் என்று என் கவிதை வாசிப்பில் கற்பனை செய்து கொண்டேன். அவ்வாறான வாசிப்புக்கும் உங்கள் கவிதை இடம் தருகிறது.
வாழ்த்துக்கள்
அன்புடன்,

எம்

*******

அன்புள்ள kj,
‘’பாம்பின் தலை’’ வாசித்தேன். 
நதியின் ஓட்டத்தில் சின்னஞ்சிறு சுழல்கள் உருவாகும். மிதக்கும் இலைகளை அமிழ்த்தும் சுழல்கள் – நதியின் விளையாட்டு போல. நதியின் சிறு ஆடல் என்று வாசிப்பில் தோன்றியது. 
அன்புடன்,

எம்

*******

மாஷா,
‘களம்’ வாசித்தேன். 
ஒரு ஜென் கவிதை ‘களம்’ வாசிப்பில் இணைந்து கொண்டது. 

அன்பு கருதியும்

வெறுப்பு கருதியும்

ஒரு ஈயை அடித்துக் கொன்று

ஒரு எறும்புக்குவழங்குகிறேன்

அன்புடன்,

எம்

*******

Masha,
’’அன்னம்’’ கவிதை சிறப்பாக இருந்தது. 
சித்தரிக்கும் குரல் யாருடையது? அது ஆணாகவும் இருக்கலாம். பெண்ணாகவும் இருக்கலாம். 
சித்தரிக்கப்படுவது யார்? அன்னை? பாட்டி? சிறு வயதில் தூக்கி வளர்த்த பெண்? கலைமகள்? திருமகள்?
பிரியத்துடன் அவள் இடும் ‘’அன்னம்’’ உடலுக்கானதா? ஆன்மாவுக்கானதா?
எல்லா சாத்தியங்களுக்கும் உங்கள் பிரதி வாய்ப்பளிக்கிறது. நல்ல கவிதை. 
அன்புடன்,

எம்

*******

மாஷா,
பெருநதியின் நீரோட்டம். கணங்களால் நீளும் ஒரு வாழ்வின் மன ஓட்டம். 
நதி பார்க்கும் போது ஒத்திசையும் மனமும் நீரும். அப்போது நீர்ப்பெருக்கில் ஒரு சுழல். மனதில் ஒரு சிறப்பான ஞாபகம். 
சுழல் சமனாகி விடும். ஞாபகமும் சமனாகும். 
என்றாலும் மீண்டும் சுழல் உருவாகும். இனிய ஞாபகம் மீண்டும் எழும். 
சுழல் நதியின் ஆடல். இனிமை ஜீவ லீலை. 
அன்புடன்,

எம்

குறிப்பு: வாழ்வின் அன்றாடத்திலிருப்பவற்றைப் படிமங்களாக மாற்றுவது மிக மிக நுட்பமான விஷயம். ‘’அச்சு’’ல் அதை நிகழ்த்தியிருக்கிறீர்கள்.

*********

Msa,
Good Morning. 
’’காதலே தான்’’ கவிதை வாசித்தேன். 
மிக உக்கிரமான கவிதை. உங்கள் கவிதைகளின் தனித்தன்மை என்பது நீங்கள் தேர்ந்தெடுக்கும் படிமங்கள். அவை இயல்பானவையாக எல்லாருக்கும் தெரிந்ததாக இருப்பவை . உங்கள் கவிதைக்குள் அவை அவர்கள் பார்க்கத் தவறும் எனினும் அவர்கள் கண் முன் இருக்கும் ஒன்றாக வெளிப்படுகின்றன. நீங்கள் அதனை வலிய திட்டமிடுவதில்லை; இயல்பாக நிகழ்கிறது என்பது அதன் சிறப்பு. 
இந்த கவிதை வலியையும் துக்கத்தையும் தீவிரமாக உணர வைத்தது.
மழை நாள், மணியறை, நகைகள் ஆகியவை வலியாக ஆகும் அடர்த்தி மிக்க தருணம் வெளிப்பட்டுள்ளது. 
சில வரிகளை எடிட் செய்து கொண்டேன்! பழக்க தோஷம்!! என்ன செய்வது? நீங்கள் கேட்டால் அதனைச் சொல்கிறேன்!
அன்புடன்,

எம்

********

(தங்கக் கூண்டு கவிதை குறித்து)

மாஷா,
இன்றைய கவிதை நன்றாக இருந்தது. 
வாழ்க்கை குறித்து லௌகிகம் குறித்து மனித சுபாவம் குறித்து கவிஞனின் வேறுபட்ட கோணம் சற்று வித்தியாசமான பார்வையில் வெளிப்பட்டுள்ளது. 
சவாலான கவிதை மாஷா. 
அன்புடன்,எம்

*****

மாஷா,
‘’பித்தம்’’ கவிதை வாசித்தேன். உள நாடகம் – பரிதவிப்பு – நிலை கொள்ளாமை என சகல விதமான உணர்வுகளும் சில வரிகளில் கொண்டு வந்துள்ளீர்கள். மேடையில் இருப்பது யார்? வந்தது யார்? எண்ணற்ற சாத்தியங்கள். நல்ல கவிதை மாஷா.
அன்புடன்,

எம்

**********

மாஷா,
நமஸ்காரம்.
‘’கேள்வி’’ மிகச் சிறப்பான கவிதை. 
அவ்வப்போது நீங்கள் பேராச்சர்யத்தை ஏற்படுத்துகிறீர்கள். 
அந்த கேள்வி என்ன என்பது பல்வேறு பதில்களை உண்டாக்குகிறது. ஒரு ஜீவனை இத்தனை உணர்ச்சி கொள்ளச் செய்யும் – அரற்றச் செய்யும் அந்த கேள்வி அல்லது கேள்விகள் ஏன் அத்தனை அபூர்வமாகக் கேட்கப்படுகிறது என்பது சிந்தித்து சிந்தித்து பார்க்க வேண்டிய ஒன்று. 
அந்த கேள்வி என்னவாயிருக்கும் என நான் சில சாத்தியங்களை யோசித்தேன். 
‘’ஓப்பன் எண்டிங்’’ ஆக நீங்கள் விட்டிருப்பதை அப்படியே – நானும் யோசித்ததைச் சொல்லாமல் விட்டுவிடுகிறேன். 
அன்புடன்,

எம்

நன்றி.. ஒவ்வொருவருக்கும் அது வெவ்வேறானது அல்லவா?

கல்பனா

********